• 07 ມ.ນ

 

 ພິທີເປີດການນຳໃຊ້ໂຮງໝໍມິດຕະພາບຫລັງໃໝ່-ພາກຂະຫຍາຍ ( 308ຕຽງ) ຢ່າງເປັນທາງການໄດ້ຈັດຂື້ນເມື່ອວັນທີ 4 ມີນານີ້ ໂດຍໃຫ້ກຽດເປັນປະທານຂອງພະນະທ່ານ ສົມດີ ດວງດີ ຮອງລັດຖະມົນຕີແຫ່ງ ສປປ ລາວ, ລັດຖະມົນຕີກະຊວງການເງິນ , ແລະ ທ່ານ ຮສ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ທ່ານຮອງລັດຖະມົນຕີກະຊວງສາທາລະນະສຸກ, ຮອງລັດຖະມົນຕີກະຊວງການຕ່າງປະເທດ ສ.ເຊັກ ພ້ອມດ້ວຍພະນັກງານແພດໝໍ, ແຂກທີ່ຖືກເຊີນທັງພາຍໃນ ແລະ ຕ່າງປະເທດເຂົ້າຮ່ວມ ທ່ານ ດຣ ສະໜອງ ທອງຊະນະ ຜູ້ອຳນວຍການໂຮງໝໍມິດຕະພາບ

 

 

ໄດ້ກ່າວລາຍງານຄວາມເປັນມາຂອງໂຄງການກໍ່ສ້າງໂຮງໝໍມິດຕະພາບຫລັງໃໝ່ພາກຂະຫຍາຍ 308 ຕຽງ ວ່າ : ໂຮງໝໍແຫ່ງນີ້ເປັນໂຮງໝໍທີນຳໃຊ້ເຕັກໂນໂລຊີ ແລະ ອຸປະກອນການແພດທີ່ທັນສະໄໝຫຼ້າສຸດໃນນະຄອນຫຼວງວຽງຈັນ

 

 

ຊຶ່່ງໄດ້ດຳເນີນການສ້າງມາແຕ່ເດືອນກໍລະກົດ 2015 ສຳເລັດ ໃນວັນທີ 28 ຕຸລາ 2018 ດຳເນີນການກໍ່ສ້າງໂດຍບໍລິສັດວາເມັດ ( vamed ) ຈາກປະເທດໂອຕຣິດ ເປັນອາຄານຕຶກ 4 ຊັ້ນມີເນື້ອທີ່ທັງໝົດ 21.229 ຕາແມັດ

 

 

ໃນນັ້ນ ເນື້ອທີ່ການປຸກສ້າງ 17,660 ຕາແມັດ, ລວມມູນຄ່າການກໍ່ສ້າງ ແລະ ຕິດຕັ້ງເຄື່ອງຈັກ 112,880,000 ຢູໂຣ ໂດຍແມ່ນທຶນກູ້ຢືມດອກເບ້ຍຕ່ຳຈາກລັດຖະບານປະເທດອອສເຕເຣຍ.

 

 

 ໂຄງການດັ່ງກ່າວແມ່ນດຳເນີນໃນຮູບແບບບໍລິສັດ ເປັນຜູ້ຮັບຜິດຊອບທັງໝົດໃນການອອກແບບກໍ່ສ້າງຕິດຕັ້ງລະບົບຕ່າງໆ ລວມທັງອຸປະກອນການແພດ ແລະ ເຄື່ອງກົນຈັກລະບົບສະໜັບສະໜູນການແພດຄົບຕາມມາດຕະຖານຝຶກການບຳລຸງຮັກສາໃນໄລຍະ 244 ເດືອນຫຼັງຈາກການມອບຮັບ.

 

 

ອາຄານໂຮງໝໍເປັນໂຮງໝໍທົ່ວໄປ ປະກອບມີຕຶກນອນ ກວດເຂດນອກ ຫ້ອງຜ່າຕັດຜົ້ງທ້ອງຜ່ານທໍ່,ພະແນກສຸກເສີນ ຊຶ່ງມີຕຽງຕິດຕາມອຸປະກອນເຊີດຊູທີ່ທັນສະໄໝຄົບຊຸດ ມີຫ້ອງຜ່າຕັດກຽມຕະຫລອດເວລາ ແລະ ມີອາຄານຕຶກນອນພິເສດ