• 20 ກ.ຍ

 

ໃນ​ວັນ​ທີ 18 ກັນ​ຍາ 2018,  ທ່ານ  ຮອງສາດສະດາຈານ ດຣ.ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້​ເດີ​ນ​ທາງ​ໄປ​ແຂວງ​ຈຳ​ປາ​ສັກ​ເພື່ອ ຕິດຕາມຊຸກຍູ້ວຽກ​ງານ ສາ​ທາ​ລະ​ນະ​ສຸກ ໂດຍ​ສະ​ເພາະ ການ​ຈັດ​ປະ​ຕິ​ບັດຍຸດທະສາດປະຕິຮູບສາທາລະນະສຸກ​ໄລ​ຍະ  II (2016-2020), ໃນໂອກາດໄດ້​ມາ​ເຮັດ​ວຽກ​ຢູ່​ແຂວງ​ຈຳ​ປາ​ສັກ​ນີ້ ທ່ານ​ຮອງ​ລັດ​ຖະ​ມົນ​ຕີ​ກະ​ຊວງ​ສາ​ທາ​ລະ​ນະ​ສຸກກໍ່ໄດ້ນໍາພາ ທ່ານ ດຣ. ນ. Jullet Fleishl ຜູ້ຕາງໜ້າ ອົງການອະນາໄມໂລກ ປະຈຳ ສ​ປ​ປ ລາວ ພ້ອມດ້ວຍຄະນະ ເຂົ້າພົບປະ ຢ້ຽມຢາມ ທ່ານ ສົມສະຫນິດ ບຸດຕິວົງ ຮອງເລຂາພັກແຂວງ ຮອງເຈົ້າແຂວງໆ ຈຳປາສັກ. ໃນ​ການ​ເຂົ້າ​ພົບ ຮອງເລຂາພັກແຂວງ ຮອງເຈົ້າແຂວງໆ ຈຳປາສັກ ຄັ້ງ​ນີ້ ກໍ່ໄດ້ປຶກ​ສາ​ຫາ​ລື ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ ຍຸດ​ທະ​ສາດ​ປະຕິ​ຮູບ​ສາ​ທາ​ລະ​​ນະ​ສຸກ 5 ກອບ​ວຽກ​ບູ​ລິ​ມະ​ສິດ ໄລ​ຍະ II ຂອງ​ພະ​ແນກ​ສາ​ທາ​ລະ​ນະ​ສຸກ​ແຂວງ,   ພ້ອມກັນນັ້ນກໍ່ໄດ້ສະແດງຂອບໃຈມາຍັງອົງການປົກຄອງແຂວງ ຈຳປາສັກ ທີ່ໄດ້ເອົາໃຈໃສ່ແລະປະກອບສ່ວນຊຸກຍູ້ການເຄື່ອນໄຫວຂອງວຽກງານສາທາລະນະສຸກ ຕາມ 8 ແຜນງານໃນ ໄລຍະຜ່ານມາ ແລະ ຮຽກຮ້ອງໃຫ້ອຳ​ນາດການປົກຄອງແຂວງທີ່ກ່ຽວຂ້ອງສືບຕໍ່ຊຸກຍູ້ໃຫ້ການຈັດຕັ້ງປະຕິບັດວຽກ ງານສາທາລະນະສຸກ ຢູ່ແຂວງຈຳປາສັກໃຫ້ບັນ​ລຸ​ສູ້​ຊົນ​ເປົ້າ​ໝາຍ 10 ຕົວຊີ້​ວັດ​ທີ່​ສະ​ພາ​ແຫ່ງຊາດ ແລະ ລັດ​ຖະ​ບານ​ຮັບ​ຮອງໃນປີ 2020