• 17 ກ.ພ

 

ໃນວັນທີ 10 ກຸມພາ ນີ້, ທ່ານ ດຣ. ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງ ສາທາລະນະສຸກ ໄດ້ຖະແຫລງຕໍ່ສື່ມວນຊົນວ່າ: ປັດຈຸບັນ, ລັດໄດ້ຕັ້ງໜ່ວຍງານຖະແຫລງຂ່າວຕອບໂຕ້ຂ່າວປອມ ໄວຣັດໂຄໂຣນາ ທີ່ກຳລັງແພ່ລະບາດຮ້າຍແຮງ ຢູ່ ຫລາຍປະເທດໃນໂລກ, ໂດຍການເປັນປະທານຂອງທ່ານລັດຖະມົນຕີກະຊວງສາທາລະນະສຸກ ແລະ ຈະມີການລາຍງານຂ່າວໃນເວລາ 15 ໂມງຂອງທຸກໆມື້, ທັງນີ້ ກໍເພື່ອໃຫ້ສັງຄົມຮັບຮູ້ຂໍ້ມູນຂ່າວສານຢ່າງຖືກຕ້ອງ,

 

 

ພ້ອມທັງກຽມຮັບມື ແລະ ຕ້ານພະຍາດດັ່ງກ່າວບໍ່ໃຫ້ແຜ່ລະບາດມາສູ່ປະເທດເຮົາ. ຮອງຫົວໜ້າກົມດັ່ງກ່າວໃຫ້ຮູ້ວ່າ: ພາຍຫລັງເກີດການແຜ່ລະບາດຂອງໄວຣັດ ໂຄໂຣນາ ຢູ່ ສປ ຈີນ, ປັດຈຸບັນຫລາຍປະເທດກໍໄດ້ເອົາໃຈໃສ່ສະກັດກັ້ນ ແລະ ປ້ອງກັນ, ຂະນະທີ່ ສປ ລາວ, ກໍຍັງບໍ່ທັນມີການພົບຜູ້ຕິດເຊື້ອພະຍາດນີ້, ແຕ່ໃນຜ່ານມາ ໄດ້ມີສື່ສັງຄົມອອນລາຍ ຈຳນວນໜຶ່ງໄດ້ອອກຂ່າວຕ່າງໆນາໆທີ່ບໍ່ມີມູນຄວາມຈິງອອກສູ່ສັງຄົມ ຄື: ເມື່ອ​ມໍ່ໆ​ມາ​ນີ້ ​ໄດ້​ມີກະ​ແສ​ຂ່າວທາງສື່ສັງຄົມອອນລາຍອອກ​ມາວ່າ: ຢູ່ແຂວງຜົ້ງສາລີ ມີຜູ້ຕ້ອງສົງໄສຕິດເຊື້ອພະຍາດອັກເສບປອດສາຍພັນໃຫມ່ ຫລື ໂຄໂຣນາໄວຣັສຈໍານວນ 27 ຄົນ ແລະ ມີຜູ້ເສຍຊີວິດແລ້ວ 3 ຄົນນັ້ນແມ່ນບໍ່ມີມູນຄວາມຈິງແຕ່ປະການໃດ ມັນ​ເປັນ​ພຽງ​ຂ່າວ​ລື​ຂອງ​ພວກ​ບໍ່​ດີ​ເທົ່າ​ນັ້ນ.

ດັ່ງນັ້ນ ຈຶ່ງຮຽກຮ້ອງໃຫ້ສັງຄົມຢ່າຫລົງເຊື່ອ ແລະ ຂໍ​ເຕືອນ​ໃຫ້​ມີ​ສະຕິ​ໃນ​ການບໍລິໂພກຂໍ້ມູນຂ່າວສານຢ່າງ​ຖືກຕ້ອງ ເພາະທຸກໆຂໍ້ມູນການລາຍງານຜູ້ຕິດເຊື້ອຂອງທາງ ການລາວແມ່ນສາມາດກວດສອບໄດ້ໂດຍຜ່ານອົງການອະນາໄມໂລກປະຈໍາລາວ ເຊິ່ງບໍ່ມີການປົກປິດຂໍ້ມູນຄວາມຈິງແຕ່ຢ່າງໃດ. ກະຊວງສາທາລະນະສຸກ ໃຫ້ຮູ້ວ່າ: ຕໍ່ກັບຄຳຖາມສັງຄົມສົນໃຈວ່າເປັນຫຍັງປະເທດໃກ້ຄຽງມີການລະບາດ ແຕ່ຢູ່ປະເທດເຮົາຍັງບໍ່ມີກໍລະນີໃດນັ້ນ ອາດຍ້ອນຫລາຍປັດໃຈເຊັ່ນ: ທີມງານຄັດກອງຢູ່ດ່ານເຂົ້າອອກໄດ້ມີການເຮັດວຽກຢ່າງຟົດຟື້ນ ເພື່ອກວດຫາກໍລະນີສົງໃສມີການຕິດຕາມເຝົ້າລະວັງບຸກຄົນ ທີ່ໄດ້ສຳພັດກັບກໍລະນີທີ່ຕິດເຊື້ອຢ່າງໃກ້ຊິດ, ນັກທ່ອງທ່ຽວຈາກປະເທດທີ່ມີການລະບາດຂອງໄວຣັດດັ່ງກ່າວເຂົ້າມາປະເທດເຮົາບໍ່ມີຫລາຍຖ້າທຽບໃສ່ປະເທດໃກ້ຄຽງ, ອາກາດບ້ານເຮົາກໍຂ້ອນຂ້າງຮ້ອນເຊິ່ງບໍ່ອຳນວຍຕໍ່ການຂະຫຍາຍຕົວຂອງເຊື້ອຈຸລະໂລກຊະນິດນີ້, ຄວາມໜາແໜ້ນຂອງພົນລະເມືອງ ແລະ ທີ່ຢູ່ອາໃສຂອງບ້ານເຮົາກໍບໍ່ໜາແໜ້ນຫລາຍ ແລະ ຢູ່ແບບເຮືອນດຽວເປັນສ່ວນໃຫຍ່ ແລະ ແນ່ນອນວັດທະນະທຳການສະບາຍດີຂອງບ້ານເຮົາແມ່ນຍົກມືນົບສະບາຍດີ. ທັງໝົດທີ່ຍົກເຫດຜົນນີ້ກໍອາດຍັງບໍ່ທັນໄດ້ມີການຢັ້ງຢືນທີ່ຊັດເຈນ ແຕ່ກໍຂໍໃຫ້ສັງຄົມຊາບວ່າ: ມາຮອດປັດຈຸບັນ ຢູ່ ປະເທດເຮົາ ຍັງບໍ່ທັນມີກໍລະນີຕິດເຊື້ອພະຍາດນີ້ແຕ່ຢ່າງໃດ ແລະ ຈົ່ງໝັ້ນໃຈໃນຄຸນນະພາບການວິເຄາະຂອງພວກເຮົາແມ່ນໄດ້ມາດຕະຖານເທົ່າກັບສາກົນ