ການສັກຢາກັນພະຍາດ ໝາກແດງນ້ອຍ-ໝາກແດງໃຫຍ່ ທົ່ວປະເທດ ໄດ້ 58%

  • 25 ພ.ຈ

ໃນໄລຍະ 9 ເດືອນຜ່ານມາ, ການສັກຢາກັນພະຍາດ ໝາກແດງໃຫຍ່-ໝາກແດງນ້ອຍ ໃຫ້ແກ່ເດັກນ້ອຍ ອາຍຸລຸ່ມ 9-15 ເດືອນ ໃນທົ່ວປະເທດ ປະຕິບັດໄດ້ 58%

ແລະ ຄາດວ່າໝົດປີ 2017 ນີ້ ຈະໃຫ້ບັນລຸໄດ້ເຖິງ 95%. ໃນຂະນະທີ່ ການລະບາດ ພະຍາດໝາກແດງ ຄັ້ງສຸດທ້າຍໃນປີ 2016 ໃນລະຫວ່າງ ເດືອນຕຸລາ ຫາ ເດືອນທັນວາ ຢູ່ແຂວງຜົ້ງສາລີ ທີ່ຢັ້ງຢືນທາງຫ້ອງວິເຄາະ ແລະ ບາດວິທະຍາ ທັງໝົດ 8 ກໍລະນີ. ສ່ວນພະຍາດໝາກແດງໃຫຍ່ ໃນທົ່ວປະເທດມີທັງໝົດ 40 ກໍລະນີ.

ຂໍ້ມູນດັ່ງກ່າວ ໄດ້ຮັບການລາຍງານ ໃນກອງປະຊຸມຊີ້ແຈງ ການນຳສະເໜີວັກແຊັງ ໝາກແດງໃຫຍ່-ໝາກແດງນ້ອຍ ເຂັມທີ 2 ເຂົ້າໃນຕາຕະລາງສັກຢາກັນພະຍາດແຫ່ງຊາດ ໃນວັນທີ 21 ພະຈິກ 2017 ທີ່ນະຄອນຫລວງວຽງຈັນ ໂດຍການເປັນປະທານ ຂອງທ່ານ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ທ່ານ ດຣ Juliet Fleischl ຜູ້ຕາງໜ້າອົງການ ອະນາໄມໂລກ ປະຈຳລາວ, ທ່ານ ດຣ Myo-Zin Nyunt ວ່າການຜູ້ຕາງ ໜ້າ ອົງການອຸຍນີເຊັບ ປະຈຳລາວ, ມີບັນດາຜູ້ຕາງໜ້າ ຈາກພະແນກ ສາທາລະນະສຸກແຂວງ ທົ່ວປະເທດ ເຂົ້າຮ່ວມ 
ທ່ານ ດຣ ບຸນກອງ ສີຫາວົງ ໄດ້ໃຫ້ຮູ້ວ່າ: ກອງປະຊຸມມື້ນີ້ສຳຄັນຫລາຍ ເພາະວ່າ ກະຊວງສາທາລະນະສຸກ ໄດ້ເອົາການສັກຢາກັນພະຍາດ ໝາກແດງນ້ອຍ-ໝາກແດງໃຫຍ່ ເຂົ້າໃນຕາຕະລາງການສັກຢາກັນພະຍາດແຫ່ງຊາດ ເຊິ່ງຈະເລີ່ມໃນຕົ້ນປີ 2018 ນີ້ ໂດຍສຸມໃສ່ ເຮັດໃຫ້ເດັກນ້ອຍທຸກຄົນ, ທຸກຊົນເຜົ່າໃນທົ່ວປະເທດ ຕ້ອງໄດ້ເຂົ້າເຖິງ ການສັກຢາກັນພະຍາດດັ່ງກ່າວ ເພື່ອເຮັດໃຫ້ພູມຄຸ້ມກັນທົ່ວໆໄປ ຂອງເດັກນ້ອຍດີຂຶ້ນ ທີ່ພວກເຮົາສາມາດ ປ້ອງກັນໄດ້ດ້ວຍວັກແຊັງ, ທັງຮັບປະກັນ ບໍ່ໃຫ້ມີການລະບາດ ຂອງພະຍາດໝາກແດງນີ້.
ໃນຊຸມປີຜ່ານມາ, ການລະບາດ ຂອງພະຍາດໝາກແດງນີ້ ໄດ້ເກີດຂຶ້ນຢູ່ໃນຫລາຍແຂວງຂອງລາວ ໂດຍສະເພາະແມ່ນ ແຂວງຜົ້ງສາລີ, ຫລວງນ້ຳທາ, ຫລວງພະບາງ, ຫົວພັນ, ຊຽງຂວາງ, ບໍລິຄຳໄຊ, ຄຳມ່ວນ ແລະ ແຂວງສະຫວັນນະເຂດ ຍ້ອນວ່າມີເດັກນ້ອຍ ຈຳນວນຫລາຍຄົນ ທີ່ຍັງບໍ່ທັນໄດ້ຮັບການສັກວັກແຊັງ ເພື່ອປົກປ້ອງເຂົາເຈົ້າ ຈາກພະຍາດອັນຕະລາຍ ໂດຍສະເພາະແມ່ນ ເດັກນ້ອຍທີ່ພໍ່ແມ່ພາໄປໄຮ່ໄປນາ ຫລື ຜູ້ທີ່ອາໄສ ຢູ່ເຂດຫ່າງໄກສອກຫລີກ ເຊິ່ງພວກເຂົາເຫລົ່ານັ້ນ ກໍມີສິດທີ່ຈະໄດ້ຮັບການປົກປ້ອງຢ່າງເທົ່າທຽມກັນ ກັບເດັກນ້ອຍຄົນອື່ນໆ. ສ່ວນອັດຕາການສັກຢາກັນພະຍາດໝາກແດງ ເຂັມທີ 1 ໃນປີ 2016 ເຫັນວ່າຍັງບໍ່ທັນໄດ້ຄາດໝາຍ ມີພຽງແຕ່ 76% ໃນທົ່ວປະເທດ. ສຳລັບອັດຕາ ການສັກຢາກັນພະຍາດ ໃນປີ 2016 ຕໍ່າສຸດ ແມ່ນ 57% ມີ ຜົ້ງສາລີ ແລະ ຊຽງຂວາງ, ສ່ວນອັດຕາສູງສຸດ ແມ່ນ ສະຫວັນນະເຂດ ໄດ້ 94% ແລະ ໄຊຍະບູລີ ໄດ້ 85% ຕາມລຳດັບ. ເຊິ່ງອັດຕາການສັກຢາ ກັນພະຍາດຕໍ່າດັ່ງກ່າວ ມີຄວາມສ່ຽງ ທີ່ຈະເຮັດໃຫ້ ສປປ ລາວ ບໍ່ສາມາດບັນລຸເປົ້າໝາຍ ໃນການກຳຈັດ ພະຍາດໝາກແດງນ້ອຍ ໄດ້ພາຍໃນປີ 2020.

Editor: ຂ່າວສານປະເທດລາວ