ພິທີປະດັບຫຼຽນໄຊແຮງງານ ຊັ້ນ I ແລະ ພິທີມອບຮັບປະກາດສະນີຍະບັດປະລິນຍາໂທການແພດເຂດຮ້ອນ

  • 11 ກ.ຍ

ໃນຕອນບ່າຍຂອງວັນທີ 31 ສີງຫາ 2018 ຢູ່ທີ່ຫ້ອງປະຊຸມອໍາຟີຂອງສະຖາບັນສາທາລະນະສຸກສາດແລະການແພດເຂດຮ້ອນ ໄດ້ຈັດພິທີປະດັບຫຼຽນໄຊແຮງງານ ຊັ້ນ I ໃຫ້ແກ່ ທ່ານ ສຈ. ດຣ. ນາງ ບຸນຍົງ ບຸບຜາ, ປະທານສະພາບໍລິຫານ ແລະ ຜູ້ປະສານງານຫຼັກໃນການສ້າງສະຖາບັນການແພດເຂດຮ້ອນ ແລະ ການເຄື່ອນໄຫວຂອງສະຖາບັນສາທາລະນະສຸກສາດ ທີ່ມີຜົນງານ, ຄຸນງາມຄວາມດີ, ປະກອບສ່ວນທາງດ້ານເຫື່ອແຮງ, ສະຕິປັນຍາ ເຂົ້າໃນການຮຽນ-ການສອນ ແລະ ເຄື່ອນໄຫວບໍລິຫານການສຶກສາ ກໍ່ສ້າງຊ່ຽວຊານພະຍາດເຂດຮ້ອນ ທັງພາຍໃນ ແລະ ຕ່າງປະເທດ ໃນໄລຍະຜ່ານມາ (ແຕ່ປີ 2000-2017) ໂດຍເປັນປະທານຂອງ ທ່ານ ຮສ. ດຣ ບຸນກອງ ສີຫາວົງ, ຮອງເລຂາຄະນະພັກກະຊວງ, ລັດຖະມົນຕີກະຊວງສາທາລະນະສຸກ ຕາງໜ້າໃຫ້ລັດຖະບານເປັນກຽດປະດັບຫຼຽນໄຊແຮງງານ ຊັ້ນ I ດັ່ງກ່າວ. ມີຫົວໜ້າ/ຮອງກົມ, ຫົວໜ້າ/ຮອງສະຖາບັນ, ຫົວໜ້າ/ຮອງພະແນກ, ພະນັກງານ, ນັກສຶກສາປະລິນຍາໂທສາທາລະນະສຸກສາດ ແລະ ນັກສຶກສາປະລິນຍາໂທການແພດເຂດຮ້ອນແລະສາທາ ລະນະສຸກລະຫວ່າງຊາດ ກໍ່ໄດ້ເຂົ້າຮ່ວມຈໍານວນ 60 ກວ່າຄົນ.

 

ໃນມື້ດຽວກັນນີ້ ທ່ານ ຮສ. ດຣ ບຸນກອງ ສີຫາວົງ, ຮອງເລຂາຄະນະພັກກະຊວງ, ລັດຖະມົນຕີກະຊວງສາທາລະນະສຸກ  ກໍ່ໄດ້ເປັນກຽດເປັນປະທານມອບໃບປະກາດສະນີຍະບັດປະລິນຍາໂທການແພດເຂດຮ້ອນແລະສາທາລະນະສຸກລະຫວ່າງຊາດ ໃຫ້ແກ່ນັກສຶກສາລຸ້ນທີ່ 18 (2016-2018) ຈໍານວນ 14 ຄົນ (ຍິງ 8 ຄົນ) ຊື່ງໃນນີ້ມີນັກສຶກສາລາວຈໍານວນ 10 ຄົນ ແລະ ມາຈາກ ສສ ຫວຽດນາມ 04 ຄົນ. ສະຖາບັນສາທາລະນະສຸກສາດແລະການແພດເຂດຮ້ອນໄດ້ມີບົດບາດຮັບປະກັນການປະກອບ ສ່ວນຂອງສະຖາບັນການແພດເຂດຮ້ອນໃນເມືອກ່ອນ “Institut de la Francophonie pour la Medicine Tropicale (IFMT)” ໃນການສ້າງຄວາມສາມາດໃຫ້ພະນັກງານຢູ່ ສປປ ລາວ ແລະ ບັນດາປະເທດທີ່ມີສ່ວນຮ່ວມ, ເພື່ອຮັກສາໄວ້ຊື່ງ (IFMT) ຈື່ງໄດ້ມີການຮ່ວມຕົວເຂົ້າກັນກັບສະຖາບັນສາທາລະນະສຸກສາດ ກາຍມາເປັນສະຖາບັນສາທາລະນະສຸກສາດແລະການແພດເຂດຮ້ອນໃນປະຈຸບັນ ໂດຍມີການຮ່ວມມືກັບບັນດາສະມາຄົມສາກົນເພື່ອການຮຽນ-ການສອນ ຊື່ງໃນນັ້ນລວມມີ ສະຖາບັນເຂດຮ້ອນ ແລະ ສາທາລະນະສຸກສາດສະວິດ, ມະຫາວິທະຍາໄລລາວານ ການາດາ ແລະ ມະຫາວິທະຍາໄລການແພດແລະການຢາຮາຍຟອງ, ສສ ຫວຽດນາມ. ສະມາຄົມລາວສາກົນເພື່ອການຮຽນ-ການສອນທີ່ສ້າງຂື້ນນີ້ມີຈຸດປະສົງເພື່ອສົ່ງເສີມກິດຈະກໍາການຄົ້ນຄວ້າແລະອົບຮົມລະຫວ່າງຊາດ ສໍາລັບຜົນປະໂຫຽດຂອງນັກສຶກສາ, ນັກຄົ້ນຄວ້າ ແລະ ບຸກຄົນຕ່າງໆຈາກບັນດາປະເທດທີ່ເຂົ້າຮ່ວມ. ພິເສດສໍາລັບການຮຽນ-ການສອນຂອງລຸ້ນທີ່ 18 ນີ້ ສ່ວນໃຫ່ຽຈະໃຊ້ເປັນພາສາອັງກິດແຕ່ຈະມີບາງອາຈານເວົ້າເປັນພາສາຝຣັ່ງ. ນອກຈາກນີ້, ພິເສດສະເພາະລຸ້ນທີ່ 18 ນີ້ ແມ່ນລຸ້ນທໍາອິດທີ່ໄດ້ຈົບການສຶກສາພາຍໃຕ້ການຄຸ້ມຄອງຂອງກະຊວງສາທາລະນະສຸກ ກໍ່ຄືຂອງ ລັດຖະບານແຫ່ງ ສປປ ລາວ.