ຂ່າວ

  • 07 ພ.ຈ

 

ພິທີເຊັນສັນຍາການຮ່ວມໃນການພັດທະນາລະບົບການແພດສຸກເສີນລະຫວ່າງໂຮງໝໍມິດຕະພາບ ກະຊວງສາລະນະສຸກ ແລະ Assistance PUBLIQVE HOPITAVX DE PARTS. FRANC ຈາກປະເທດ ຝຼັງເສດ

  • 16 ມ.ກ


ໃນທ້າຍອາທິດຜ່ານມາ ທີ່ໂຮງໝໍເດັກໄດ້ຈັດພິທີເປີດນຳໃຊ້ຕຶກອົບຮົມແພດເດັກຂື້ນ ໂດຍມີທ່ານ ຮສ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໄດ້ເຂົ້າຮ່ວມເປັນປະທານ ໃນພິທີເປີດການນຳໃຊ້ຕຶກອົບຮົມແພດເດັກ, ຊື່ງໄດ້ຮັບການສະໜັບສະໜູນເງິນຊ່ວຍເຫຼືອລ້າຈາກລັດຖະບານ ສ. ເກົາຫຼີ ຜ່ານອົງການກອຍກາ ໃນໂຄງການໄອໂຮບ. ຈຸດປະສົງແມ່ນເພື່ອພັດທະນາ ແລະ ບັນລຸໜຶ່ງໃນບັນດາຕົວຊີ້ວັດທີ່ເປັນບູລິມະສິດທາງດ້ານຂະແໜງສາທາລະນະສຸກທີ່ຮັບຮອງໂດຍສະພາແຫ່ງຊາດ, ເພື່ອເປັນສະຖານທີ່ຝຶກອົບຮົມໃຫ້ແກ່ແພດຊ່ຽວຊານເດັກ ນັກສຶກສາວິທະຍາໄລວິທະຍາສາດສຸຂະພາບ. ເຊີ່ງໃນພິທີມີບັນດາຫົວໜ້າຫ້ອງການ, ຫົວໜ້າກົມ, ສະຖາບັນ, ໂຮງໝໍ, ມະຫາວິທະຍາໄລ ແລະ ສູນຕ່າງໆອ້ອມຂ້າງກະຊວງສາທາລະນະສຸກເຂົ້າຮ່ວມຢ່າງພ້ອມພຽງ. ນອກຈາກນັ້ນຍັງມີພາກສ່ວນອົງການຈັດຕັ້ງສາກົນຄື ທ່ານຫົວໜ້າກົມອາຊີປາຊີຟິກ ແລະ ອາເມລິກາ, ກະຊວງການຕ່າງປະເທດ, ກະຊວງແຜນການ ແລະ ການຮ່ວມມື, ສະຖານທູດ ເກົາຫຼີ, ອົງການກອຍກາ, ໂຄງການໄອໂຮບ, ນາຍບ້ານໂພນສະຫວ່າງ, Health Frontier, HI ແລະ REI ກໍ່ໄດ້ເຂົ້າຮ່ວມ

  • 08 ມ.ກ

 

ມະຫາວິທະຍາໄລວິທະຍາສາດສຸຂະພາບ ໄດ້ຈັດພິທີສະເຫຼີມສະຫຼອງວັນສ້າງຕັ້ງໂຮງຮຽນແພດຄົບຮອບ 60ປີຂື້ນ ໃນວັນທີ 25 ທັນວາ ທີ່ມະຫາວິທະຍາໄລດັ່ງກ່າວ, ພາຍໃຕ້ການເປັນປະທານຂອງທ່ານ ຮສ ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ພ້ອມດ້ວຍຮອງລັດຖະມົນຕີ, ອະດີດພະນັກງານບຳນານ - ອາວຸໂສ, , ອະທິການບໍດີ, ຄູ-ອາຈານ, ນັກສຶກສາ ແລະ ແຂກຖືກເຊີນເຂົ້າຮ່ວມ ໂດຍຕອບສະໜອງຄວາມມຸ້ງມາດປາດຖະໜາຂອງປວງຊົນລາວໃນການພັດທະນາ ແລະ ກໍ່ສ້າງບຸກຄະລາກອນສາທາລະນະສຸກໃຫ້ຮັບໃຊ້ວຽກງານບໍລິການແກ່ປວງຊົນທົ່ວປະເທດ, ມາຮອດປີ 1958 ການສ້າງໂຮງຮຽນແພດຢູ່ລາວໄດ້ເລີ້ມສ້າງຂື້ນຢ່າງເປັນທາງການ

 

 

 ນັ້ນແມ່ນຂີດໝາຍອັນສຳຄັນດ້ານປະຫວັດສາດທີ່ແມ່ນຜົນສຳເລັດອັນລວມຍອດຂອງບັນດາຄູອາຈານ - ພະນັກງານແຕ່ລະໄລຍະທີ່ໄດ້ອຸທິຕົນເຂົ້າໃນການກໍ່ສ້າງ ແລະ ພັດທະນາບຸກຄະລາກອນສາທາລະນະສຸກໃນຂະແໜງວິຊາຕ່າງໆດ້ວຍຄວາມເສຍສະຫຼະ ແລະ ມີມານະອົດທົນຜ່ານຜ່າຄວາມຫຍຸ້ງຍາກນາໆປະການຕະຫຼອດໄລຍະ 60ປີ

  • 13 ທ.ວ

ໃນວັນທີ 3 ທັນວາ 2018, ທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ ເດີນທາງຢ້ຽມຢາມເຮັດວຽກ ແລະ ເຂົ້າຮ່ວມກອງປະຊຸມຄະນະກໍາມາທິການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກນິກ (JC) ຄັ້ງທີ 11 ລະຫວ່າງ ສປປ ລາວ ແລະ ມົງໂກລີ, ທີ່ນະຄອນຫຼວງອູລານບາຕໍ, ປະເທດມົງໂກລີ.

ກອງປະຊຸມຄະນະກໍາມາທິການຮ່ວມ ຄັ້ງນີ້ຈັດຂຶ້ນພາຍໃຕ້ການເປັນປະທານຮ່ວມຂອງ ທ່ານ ຮສ.ດຣ. ບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ທັງເປັນປະທານຄະນະກໍາມາທິການຝ່າຍລາວ ແລະ ທ່ານ ນາງ. ດ. ຊາຣັງເກເຣນ, ລັດຖະມົນຕີກະຊວງສາທາລະນະສຸກ ມົງໂກລີ ທັງເປັນປະທານຄະນະກໍາມາທິການຝ່າຍມົງໂກລີ ແລະ ການເຂົ້າຮ່ວມຂອງພາກສ່ວນກ່ຽວຂ້ອງຂອງສອງຝ່າຍ. ກອງປະຊຸມໄດ້ທົບທວນຄືນການຈັດຕັ້ງປະຕິບັດຜົນຂອງກອງປະຊຸມຄະນະກໍາມາທິການຮ່ວມ ຄັ້ງທີ 10 ທີ່ຜ່ານມາໃນປີ 2015 ທີ່ນະຄອນຫຼວງວຽງຈັນ, ສປປ ລາວ, ເຊິ່ງເຫັນວ່າມີຄວາມຄືບໜ້າໃນລະດັບໃດໜຶ່ງ ແລະ ສືບຕໍ່ປຶກສາຫາລືທິດທາງການຮ່ວມມືໃນອີກ 2 ປີຂ້າງໜ້າ (2018-2020) ລະຫວ່າງສອງປະເທດເພື່ອເສີມຂະຫຍາຍການພົວພັນຮ່ວມມືລະຫວ່າງສອງປະເທດ. ໃນນັ້ນ, ສອງຝ່າຍໄດ້ເນັ້ນເຖິງການສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ການໄປມາຫາສູ່ລະຫວ່າງຂະແໜງການຕ່າງໆ ທີ່ສອງຝ່າຍມີທ່າແຮງຮ່ວມມືກັນ ເປັນຕົ້ນ: ດ້ານສາທາລະນະສຸກ, ສຶກສາ, ກະສິກໍາ, ພະລັງງານ, ສະພາການຄ້າ ກໍຄື ກະຊວງອຸດສາຫະກໍາ ແລະ ການຄ້າ, ການພົບປະນັກທຸລະກິດ. ສອງຝ່າຍໄດ້ສະແດງຄວາມຍິນດີ ແລະ ຊົມເຊີຍທີ່ສໍາເລັດການຂົນສົ່ງແກະຈໍານວນ 1,050 ໂຕ ທີ່ເປັນຂອງຂວັນຂອງລັດຖະບານມົງໂກລີ ມອບໃຫ້ ສປປ ລາວ ໂດຍມີພິທີມອບ-ຮັບແກະໃນວັນທີ 23 ພະຈິກ 2018 ທີ່ຜ່ານມາ. ນອກນີ້, ສອງຝ່າຍຕົກລົງປະຕິບັດທຶນການແລກປ່ຽນນັກສຶກສາ ແລະ ເພີ່ມເບ້ຍລ້ຽງຈາກ 80 ໂດລາສະຫະລັດ ມາເປັນ 150 ໂດລາສະຫະລັດ.

ໃນໂອກາດເດີນທາງເຂົ້າຮ່ວມກອງປະຊຸມຄະນະກໍາມາທິການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກນິກ ຄັ້ງນີ້, ສອງຝ່າຍໄດ້ລົງນາມ 2 ເອກະສານຄື: ບົດບັນທຶກຄວາມເຂົ້າໃຈຂອງກອງປະຊຸມຄະນະກໍາມາທິການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກນິກ ຄັ້ງທີ 11 ແລະ ບົດບັນທຶກຄວາມເຂົ້າໃຈວ່າດ້ວຍການຮ່ວມມືລະຫວ່າງກະຊວງສາທາລະນະສຸກຂອງ ສປປ ລາວ ແລະ ກະຊວງສາທາລະນະສຸກ ມົງໂກລີ 2018-2020.

ຄະນະຝ່າຍລາວນອກຈາກເຂົ້າຮ່ວມກອງປະຊຸມທີ່ກ່າວມາຂ້າງເທິງແລ້ວ ຍັງໄດ້ຢ້ຽມຢາມພົບປະທ່ານ ຢໍ ບາທາຣ໌ບີເລັກ, ສະມາຊິກສະພາຄູຣານໃຫຍ່, ຫົວຫນ້າກຳມາທິການນະໂຍບາຍສັງຄົມ, ສຶກສາ, ວັດທະນະທຳ ແລະ ວິທະຍາສາດ ທັງເປັນປະທານສະມາຄົມມິດຕະພາບມົງໂກລີ-ລາວ, ຢ້ຽມຢາມໂຮງໝໍສູນກາງເລກ 1 ຂອງມົງໂກລີ, ມະຫາວິທະຍາໄລກະເສດມົງໂກລີ ແລະ ພົບປະຫາລືລະຫວ່າງສອງກົມອາຊີ-ປາຊີຟິກ ແລະ ອາຟຣິກາ, ກະຊວງການຕ່າງປະເທດຂອງ ສປປ ລາວ ແລະ ມົງໂກລີ.

ກອງປະຊຸມໄດ້ອັດລົງດ້ວຍຜົນສໍາເລັດຢ່າງຈົບງາມດ້ວຍບັນຍາກາດມີຄວາມເຂົ້າອົກເຂົ້າໃຈກັນ ແລະ ໄມຕີຈິດມິດຕະພາບການຮ່ວມມືມູນເຊື້ອອັນດີງາມລະຫວ່າງສປປ ລາວ ແລະ ມົງໂກລີ. ກອງປະຊຸມຄະນະກໍາມາທິການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກນິກ ເປັນກົນໄກປະຊຸມກັນທຸກໆ 2 ປີ ແລະ ຄັ້ງທີ 12 ຈັດຂຶ້ນໂດຍການເປັນເຈົ້າພາບຂອງ ສປປ ລາວ.