ຂ່າວ

  • 17 ພ.ສ

 

 ພາຍ​ໃຕ້​ການເປັນປະທານ​ຂອງ​ ທ່ານ ດຣ ຄໍາເພັດ ມະນີວົງ ຫົວໜ້າກົມແຜນການ-ການຮ່ວມມື, ຜູ້ອໍານວຍການກອງທືນໂລກ, ທ່ານ ປອ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ທ່ານ ດຣ. ນ. ພອນນາລີ ຈິດຕະມະນີ ຫົວໜ້າສູນຄວບຄຸມວັນນະໂລກ.

 

 

ມີແຂກເຂົ້າຮ່ວມຈາກ: ກົມເສນາຮັກ ກະຊວງປ້ອງກັນຄວາມສະຫງົບ, ພະນແນກກັນພະຍາດ, ຫົວໜ້າຂະແໜງຄວບຄຸມພະຍາດຕິດຕໍ່, ຜູ້ຮັບຜິດຊອບວັນນະໂລກຂັ້ນແຂວງ 18 ແຂວງ, 06 ໂຮງໝໍໃນນະຄອນຫຼວງວຽງຈັນ, ຊ່ຽວຊານ ຈາກອົງການອະນາ​ໄມ​ໂລກ, ຫ້ອງການກອງທືນໂລກ, ອົງການ CHAI, ທີ່ປືກສາ ທະນາຄານໂລກ, ບັນດາອົງການຈັດຕັ້ງສັງຄົມ: PEDA, LaoPha, LaoYu, PSI, HPP, ຄະນະ​ສູນຄວບຄຸມວັນນະໂລກ ແລະ ວິຊາ​ການ ​ເຂົ້າ​ຮ່ວມ​ ລວມທັງໝົດ 101 ທ່ານ.

 

 

ກອງປະຊຸມໄດ້ດຳເນີນເປັນເວລາ 02 ວັນ ນັບແຕ່ວັນທີ 9 – 10 ພຶດສະພາ 2019, ເຊີ່ງໄດ້ຍົກຫຼາຍຫົວຂໍ້ຂື້ນມາສົນທະນາ ໂດຍສະເພາະ ການສ້າງແຜນງົບປະມານລັດຈາກຂັ້ນເມືອງ/ແຂວງຫາສູນກາງ, ການສ້າງທິມງານຂັ້ນແຂວງລົງຊອກຄົ້ນຄົນເຈັບກັບທີ່, ການນຳໃຊ້ງົບປະມານນຳສົ່ງຕົວຢ່າງຈາກຂັ້ນສຸກສາລາ ແລະ ເມືອງ ຫາໜ່ວຍງານ Xpert ຢູ່ຂັ້ນແຂວງ, ການຂະຫຍາຍການປ້ອນຂໍ້ມູນ ຄົນເຈັບວັນນະໂລກໃນທົ່ວປະເທດ, ການຈັດຕັ້ງປະຕິບັດວຽກງານຄວບຄຸມວັນນະໂລກໃນກຸ່ມປະຊາກອນເຄື່ອນຍ້າຍ 2019 ຫາ 2021, ການກະກຽມຈັດຕັ້ງປະຕິບັດໂຄງການຫັນສາໃນແຂວງຜົ້ງສາລີ, ອຸດົມໄຊ, ຊຽງຂວາງ ແລະ ຫົວພັນ, ການກະກຽມປະເມີນໂຄງການຈາກຊ່ຽວຊານພາຍນອກເພື່ອກະກຽມສ້າງແຜນຍຸດທະສາດ 2021 ຫາ 2025, ແລະ ສະເໜີຜົນໄດ້ຮັບກອງປະຊຸມການຳລະດັບສູງ (UN High Level Meeting).

 

 

ຜູ້ແທນກອງປະຊຸມໄດ້ສົນທະນາຢ່າງກົງໄປກົງມາຫຼາຍໆດ້ານ ແລະ ໄດ້ຮັບຜົນດັ່ງນີ້: ການນໍາສົ່ງຕົວຢ່າງຈາກຫົວໜ່ວຍບົ່ງມະຕິ, ເຫັນດີໃຫ້ສືບຕໍ່ປະຕິບັດຕາມຂໍ້ແນະນໍາເພີ່ມເຕີມຂັ້ນຕອນການຈັດຕັ້ງປະຕິບັດການນໍາສົ່ງຕົວຢ່າງ ເລກທີ 166/ສຄວລ,ວັນທີ 15/ກຸມພາ/2019, ພ້ອມແນບໜັງສືແນະນໍາຈາກພະແນກສາທາລະນະສຸກແຂວງ;ການຈັດຕັ້ງທິມຂັ້ນແຂວງໃນການລົງຊອກຄົ້ນຄົນເຈັບກັບທີ່ຢູ່ 03 ແຂວງຄື: ແຂວງຫຼວງພະບາງ, ຈຳປາສັກ ແລະ ແຂວງສະຫວັນນະເຂດ; ວຽກງານຄຸ້ມຄອງສາງ ເຫັນດີໃຫ້ເອົາຢາເຂົ້າໃນລະບົບM-Supply ຂອງກະຊວງສາທາລະນະສຸກ ແລະ ວຽກງານຄຸ້ມຄອງຄົນເຈັບວັນນະໂລກຮູບແບບມິດງຽບ (Latent TB Infection) ໃຫ້ກະກຽມຂຽນແຜນ ແລະ ຈັດຕັ້ງປະຕິບັດໃນຕໍ່ໜ້າ.

  • 23 ຕ.ລ

 

ພະຍາດມະເຮັງເປັນພະຍາດໜື່ງທີ່ອັນຕະລາຍຕໍ່ສຸຂະພາບຂອງປະຊາຊົນໃນທົ່ວໂລກ ໃນແຕ່ລະປີ ມີຄົນເສຍຊີວິດຍ້ອນພະຍາດມະເຮັງປະມານ 8 ລ້ານຄົນໃນທົ່ວໂລກ, ສະເພາະພາກພື້ນອາຊີ ມີປະມານ 2.8 ລ້ານຄົນຕໍ່ປີ ແລະ ບັນຫາຂອງພະຍາດມະເຮັງຢູ່ ສປປ ລາວ ກໍ່ເຫັນວ່າ ມີທ່າອ່ຽງເພີ້ມຂື້ນ. ເຫັນໄດ້ບັນຫາຂອງພະຍາດດັ່ງກ່າວ ການນຳະຊວງສາທາລະນະສຸກ ໄດ້ມອບໝາຍໃຫ້ໂຮງໝໍມິດຕະພາບ ສ້າງພະແນກມະເຮັງຂື້ນແຕ່ປີ 2009 ເປັນຕົ້ນມາ. ການບໍລິການປິ່ນປົວມະເຮັງໄດ້ມີການປັບປຸງ ແລະ ພັດທະນາຕະຫຼອດມາ, ຮອດປີ 2017 ການນຳຂອງກະຊວງສາທາລະນະສຸກໄດ້ຕົກລົງຍົກລະດັບຈາກ ພະແນກມະເຮັງເປັນສູນມະເຮັງທີ່ຂື້ນກັບການຄຸ້ມຄອງຂອງໂຮງໝໍມິດຕະພາບ. ໃນວັນ 17 ຕຸລາ 2018 ທີ່ຜ່ານມາ, ທ່ານ ຄຳພອນ ພຸດທະວົງ ເລຂາຄະນະພັກກະຊວງສາທາລະສຸກ, ຮອງລັດຖະມົນຕີ ກະຊວງສາທາລະນະສຸກ ຕາງໜ້າໃຫ້ການນຳຂອງກະຊວງສາທາລະນະສຸກ ເປັນປະທານກອງປະຊຸມ ປະກາດການແຕ່ງຕັ້ງ ດຣ ເພັດສະໝອນ ອາລຸນລັງສີ ເປັນຫົວໜ້າສູນມະເຮັງ.

 

 

ໃນກອງປະຊຸມ ທ່ານໄດ້ມີຄຳເຫັນເນັ້ນໜັກໃຫ້ສູນມະເຮັງເປັນຈຸດໃຈກາງໃນການລວບລວມຂໍ້ມູນ, ພັດທະນາຫຼັກການ, ລະບຽບການດ້ານມະເຮັງໃຫ້ມີຄວາມເປັນເອກະພາບໃນທົ່ວປະເທດ ແລະ ໃຫ້ການບໍລິການຮັບໃຊ້ ປະຊາຊົນບັນດາເຜົ່າໃຫ້ທົ່ວເຖິງ, ມີຄຸນນະພາບດີຂື້ນກວ່າເກົ່າ ແລະ ຫຼຸດຜ່ອນການໄປປິ່ນປົວຢູ່ຕ່າງ ປະເທດ, ເພື່ອເຮັດໃຫ້ໄດ້ແນວນັ້ນ ພະນັກງານລັດຖະກອນສູນມະເຮັງຕ້ອງໄດ້ເອົາໃຈໃສ່ປັບປຸງລະບອບ ແບບແຜນວິທີເຮັດວຽກຂອງຕົນໃຫ້ມີປະສິດທິພາບຂື້ນ, ຕ້ອງມີການປະສານສົມທົບຢ່າງກົມກຽວກັບ ໂຮງໝໍມິດຕະພາບ ແລະ ໄດ້ຮຽກຮ້ອງໃຫ້ແຕ່ລະພາກສ່ວນສືບຕໍ່ສະໜັບສະໜູນ ເພື່ອປັບປຸງພັດທະນາສູນ ໃຫ້ມີຄວາມກ້າວໜ້າທັນສະໄໝຂື້ນເລື້ອຍໆ. ປະຈຸບັນ ສູນມະເຮັງ ສາມາດປິ່ນປົວມະເຮັງດ້ວຍການ ສາຍແສງເປັນແຫ່ງທຳອິດຂອງປະເທດລາວ, ມີການປິ່ນປົວດ້ວຍເຄມີບຳບັດ, ປິ່ນປົວປະຄັບປະຄອງ ແລະ ການຜ່າຕັດ, ສູນມະເຮັງມີບຸກຄະລາກອນສາຂາວິຊາຕ່າງໆ ເຊັ່ນ: ຊ່ຽວຊານມະເຮັງ ແລະ ວິຊາການທີ່ ຈຳເປັນດ້ານຕ່າງໆຈຳນວນໜຶ່ງ.

 

 

ເພື່ອກຽມຄວາມພ້ອມໃນການບໍລິການຮອບດ້ານໃຫ້ແກ່ປະຊາຊົນບັນດາ ເຜົ່າຢູ່ ສປປ ລາວ, ສູນມະເຮັງໄດ້ສົ່ງພະນັກງານໄປຮຽນຕໍ່ຢູ່ຕ່າງປະເທດຈຳນວນໜຶ່ງ, ໃນອະນາຄົດ ສູນມະເຮັງມີທິດທາງພັດທະນາປະສິດທິພາບໃນການວິໄຈມະເຮັງໃຫ້ມີຄວາມຮອບດ້ານຍິ່ງຂື້ນ, ໂດຍຈະ ແນໃສ່ສ້າງຕັ້ງ ແລະ ປັບປຸງຫ້ອງວິເຄາະເຊິ່ງເປັນວຽກພື້ນຖານທີ່ສຳຄັນໃນການບົ່ງມະຕິ, ປິ່ນປົວ, ການລົງທະບຽມະເຮັງ ແລະ ການສຶກສາຄົ້ນຄວ້າໃນຕໍ່ໜ້າ.

  • 06 ມ.ນ

 

 ແມ່ນຂື້ນກັບກະຊວງສາທາລະນະສຸກ ແລະ ຕັ້ງຢູ່ໃນວິທະຍາເຂດຂອງມະຫາວິທະຍາໄລວິທະຍາສາດສຸຂະພາບໂດຍມີພາລະບົດບາດສຳຄັນໃນການເຮັດບົດຄົ້ນຄວ້າທີໄດ້ມາດຖານ ແລະ ເປັນບ່ອນຝຶກອົມຮົມ ແລກປ່ຽນປະສົບການ-ຄວາມຮູ້ກ່ຽວກັບພະຍາດຊຶມເຊື້ອຕ່າງໆ ດັ່ງນັ້ນ ໃນອາທິດຜ່ານມາສູນວິໃຈພະຍາດຊຶມເຊຶື້ອ ລາວ-ຄຣິສຕົປເມຣິເອີ ຈຶ່ງໄດ້ຈັດພິທີສະຫຼອງວັນສ້າງຕັ້ງສູນຄົບຮອບ 10 ປີ.

 

 

ພິທີດັ່ງກ່າວໄດ້ຮັບກຽດເປັນປະທານໂດຍທ່ານ ຮສ ດຣ ບຸນກອງ ສີຫວົງ ລັດຖະມົນຕີກະຊວງສາທາລະນະສຸກ ມີຜູ້ຕາງໜ້າ Fondation meriew ຈາກປະເທດຝຮັ່ງ, ຫົວໜ້າ ຫ້ອງການກະຊວງ, ຫົວໜ້າກົມ, ຮອງກົມ, ສະຖາບັນ, ສູນ, ອຳນວຍການໂຮງໝໍ ແລະ ພາກສ່ວນກ່ຽວຂ້ອງເຂົ້າຮ່ວມ.

 

 

ພິທີດັ່ງກ່າວ ໄດ້ມີການສາຍວີດີໂອຮູບພາບກ່ຽວກັບກິດຈະກຳ ແລະ ຜົນງານອັນພົ້ນເດັ່ນ ຂອງສູນໃນໄລຍະ 10 ປີ ຜ່ານມາໃຫ້ຜູ້ເຂົ້າຮ່ວມໄດ້ຮັບຊົມ.

  • 01 ມ.ນ

ສູູ້ຊົນ​ສ້າງ​ພະນັກງານ​ສາທາລະນະ​ສຸກ​ໃຫ້ມີ​ຄຸນ​ນະພາ​ບສູງ​ເມື່​​ອຮອດ​ປີ 2020

ຄໍາວັນ ລາດພົມມະຈັນ

      ​ວຽກ​ງານ​ສາທາລະນະ​ສຸກ​ເປັນ​ວຽກ​ງານ​ໜຶ່ງ​ທີ່​ມີ​ບົດບາ​ດສໍາຄັນ​​ປະກອບ​ສ່ວນ​​ເຂົ້າ​​ໃນ​ການພັດທະນາ​​ເສດຖະກິດ-ສັງຄົມ​​ແຫ່ງ​ຊາດ; ທັງ​ເປັນ​ວຽກ​ງານ​ປາຍ​ແຫຼມ ​ເພື່ອ​ແກ້​ໄຂຄວາມ​ທຸກ​ຍາກ ​ແລະ ​​ຫຼຸດຜ່ອນການ​ເຊື່ອ​ຖື​ແບບ​ງົມງວາຍ​ຂອງ​ປະຊາຊົນ​ບັນດາ​ເຜົ່າ. ດັ່ງ​ນັ້ນ, ເພື່ອ​ຮັບປະກັນ​ໃຫ້ຄົນ​ລາວ​ທຸກ​ຄົນ​ໄດ້​​ເຂົ້າ​ເຖິງ​ການ​ບໍລິການດ້ານ​ສຸຂະພາບ​ຢ່າງ​ທົ່ວ​ເຖິງ ​ແລະ ມີ​ຄຸນ​ນະພາ​ບ ການພັດ​ທະ​ນາ​ພະນັກງານ​ໃນ​ຂະ​ແໜງ ສາທາລະນະ​ສຸກ​ໃຫ້ມີ​ຄຸນ​ນະພາ​ບສູງ ຈຶ່ງ​ມີ​ຄວາມ​ຈໍາ​ເປັນ​ຢ່າງ​ຍິ່ງ​​ໃນ​ຍຸກ​ປັດຈຸບັນ. ​ໃນ​ເອກະສານ​ກອງປະ ຊຸມ​ໃຫຍ່​ຄັ້ງ​ທີ X ຂອງ​ພັກ​ໄດ້​​ເນັ້ນວ່າ: “ສ້າງ​ໃຫ້​ໄດ້ພະ​ນັກ​ງານ​ແພດ, ພະຍາບານ​ທີ່​ມີ​ຄວາມ​ຊຳນິຊໍາ​ນານ ​ແລະ ມີ​ຈັນ​ຍາ​ບັນ, ທັດສະນະ​ຮັບ​ໃຊ້, ບໍລິການ​ທີ່​ດີ ​ແລະ ນໍາ​ໃຊ້​ເຕັກ​ໂນ​ໂລ​ຊີ​ຢ່າງ​ເໝາະສົມ”(1).

​ຕະຫຼອດໄລຍະ​ຜ່ານ​ມາ ຄະນະພັກ-ຄະນະນໍາຂອງຂະແໜງສາທາລະນະສຸກ ໄດ້​ເອົາ​ໃຈໃສ່ຍົກ​ສູງ​ຄຸນ​ນະພາ​ບພະນັກງານ​ໃນ​ຂະ​ແໜງສາທາລະນະ​ສຸກ​ຢ່າງ​ຕັ້ງໜ້າ ດ້ວຍການສຸມໃສ່ກໍ່ສ້າງ ແລະ ບໍາລຸງຍົກລະດັບທາງດ້ານຄຸນທາດການເມືອງ, ທັດສະນະຫຼັກໝັ້ນ, ຄຸນສົມບັດສິນທໍາປະຕິວັດ, ຈັນຍາທໍາ, ຈັນຍາບັນ, ມີນໍ້າໃຈດີ, ທ່າທີ່ການຮັບໃຊ້ທີ່ດີ, ມີຄວາມຮູ້-ຄວາມສາມາດ, ຄວາມຊໍານິຊໍານານ ແລະ ຄວາມຫ້າວຫັນຕື່ນຕົວກຽມພ້ອມປະຕິບັດໜ້າທີ່ຢູ່ທຸກບ່ອນ ແລະ ທຸກເວລາທີ່ປະເທດຊາດຕ້ອງການ; ພ້ອມນັ້ນ​ ກໍ​ໄດ້ເອົາໃຈໃສ່ປະຕິບັດຫຼັກການນໍາພາ ແລະ ແບບແຜນວິທີການເຮັດວຽກແບບ ລວມສູນປະຊາທິປະໄຕ ​ເຊິ່ງມີການແບ່ງວຽກ, ​ແບ່ງຄວາມຮັບຜິດຊອບຢ່າງຈະແຈ້ງ. ​ປີ 2017 ​ຄະນະ​ພັກ-​ຄະນະ​ນຳ ໄດ້​​ສົ່ງພະນັກງານຂັ້ນ​ນໍາພາ​ຄຸ້ມ​ຄອງ​ໄປຍົກ​ລະດັບ​ທາງ​ດ້ານ​ທິດ​ສະ​ດີການ​ເມືອງ-ການ​ປົກຄອງ 2 ສະຫາຍ, ​ບໍາລຸງ​ສ້າງໄລຍະ​ສັ້ນ​ຢູ່ ສປ ຈີ​ນ 2 ສະຫາຍ, ຝຶກ​ອົບຮົມ​ທິດ​ສະ​ດີກາ​ນ​ເມືອງ-ການ​ປົກຄອງ​ໄລຍະ 45 ວັນ​​ໃຫ້​ພະນັກງານຫຼັກ​ແຫຼ່ງຂອງຂະ​​ແໜງ​ສາທາລະນະ​ສຸກ​ໄດ້ 65 ຄົນ; ຄຽງຄູ່​ກັນ​ນັ້ນກໍ​ໄດ້​ກໍ່ສ້າງ ​ແລະ ບໍາລຸງຍົກ​ລະດັບພະນັກງານ​ວິຊາ​ການຢ່າງ​ເປັນ​ລະບົບ​ຕໍ່​ເນື່ອງເຮັດ​ໃຫ້​ພະນັກງານ​​ໃນ​ຂະ​ແໜງ​ສາທາລະນະ​ສຸກ​ເຕີບ​​ໃຫຍ່​ຂະຫຍາຍຕົວ​ເປັນ​ກ້າວໆ. ປັດຈຸ​ບັນ​ພະນັກງານ​ທົ່ວ​ຂະ​ແໜງສາທາລະນະ​ສຸກ​ມີ​ທັງໝົດ 20.413 ຄົນ; ​ໃນ​ນີ້​ ຂັ້ນ​ສູນ​ກາງ 3.553 ຄົນ, ​ຂັ້ນ​ແຂວງ 4.890 ຄົນ, ຂັ້ນ​ເມືອງ 7.469 ຄົນ, ​ໂຮງໝໍ​ນ້ອຍ (ສຸກສາລາ) 4.395 ຄົນ ​ແລະ ຂັ້ນ​ບ້ານ 106 ຄົນ; ​ປະກອບມີ​ປະລິນຍາ​ເອກ 31 ທ່ານ, ຊ່ຽວຊານ​ຂັ້ນ II ຈໍານວນ 38 ທ່ານ, ຊ່ຽວຊານຂັ້ນ I ຈໍານວນ 568 ທ່ານ, ປະລິນຍາໂທ 365 ຄົນ, ປະລິນຍາຕີ ແລະ ປະລິນຍາຕີລົງເລິກຂະແໜງ 4.175 ຄົນ, ຊັ້ນສູງ 2.404 ຄົນ, ຊັ້ນກາງ 9.619 ຄົນ, ຊັ້ນຕົ້ນ 3.160 ຄົນ ແລະ ບໍ່ມີຊັ້ນວິຊາສະເພາະ 53 ຄົນ; ພະນັກງານ​ທີ່ສັງກັດຢູ່ຂົງເຂດບໍລິຫານ ກວມ 10,1%, ຂົງ​ເຂດ​ປິ່ນປົວ ​ແລະ ສົ່ງ​ເສີມ​ສຸຂະພາບ ກວມ 86,2% ​ແລະ ຂົງ​ເຂດ​ການ​ສິດສອນ ກວມ 3,7%. ໃນຂອບເຂດທົ່ວປະເທດຂະແໜງສາທາລະນະສຸກປະກອບມີພື້ນຖານໂຄງລ່າງທີ່​ອໍານວຍຄວາມ​ສະດວກ​ໃຫ້ແກ່ການກໍ່ສ້າງ ​ແລະ ບໍາລຸງ​ຍົກ​ລະດັບພະນັກງານຂັ້ນ​ຕ່າງໆ ທັງໝົດມີ 10 ແຫ່ງຄື: ມະຫາວິທະຍາໄລ ວິທະຍາສາດສຸຂະພາບ 1 ແຫ່ງ, ວິທະຍາໄລວິທະຍາສາດສຸຂະພາບ 3 ແຫ່ງ, ໂຮງຮຽນສາທາລະນະສຸກ 4 ແຫ່ງ ແລະ ສູນຝຶກອົບຮົມ 2 ແຫ່ງ. ໃນສົກປີ 2017 ທົ່ວ​ປະ​ເທດມີຜູ້ສໍາເລັດການສຶກສາລຸ່ມມະຫາວິທະຍາໄລຈາກສະຖາບັນການສຶກສາຂອງຂະແໜງສາທາລະນະສຸກແຫ່ງຕ່າງໆ​ ທັງໝົດ 1.522 ຄົນ; ໃນນີ້ ຊັ້ນສູງ 1.067 ຄົນ, ຊັ້ນກາງ 356 ຄົນ, ຊັ້ນຕົ້ນ (ແພດປະຈຳບ້ານ) 129 ຄົນ; ການສຶກສາຊັ້ນປະລິນຍາຕີ ແລະ ເໜືອມະຫາວິທະຍາໄລ ທັງໝົດ 498 ຄົນ; ໃນນີ້ ມີຊ່ຽວຊານຂັ້ນ I ຈໍານວນ 74 ຄົນ, ປະລິນຍາໂທ 53 ຄົນ, ປະ​ລິນ​ຍາຕີ 371 ຄົນ; ນອກ​ນີ້​ກໍ​ຍັງມີ​ຜູ້​ສໍາ​ເລັດ​ການສຶກສາ​ດ້ານ​ວຽກ​ງານ​ສາທາລະນະ​ສຸກ​ຈາກຕ່າງປະ​ເທດ​ອີກ 43 ຄົນ.​ ຄຽງຄູ່​ກັນ​ນັ້ນກໍ​​ໄດ້ບໍາລຸງ-ຍົກ​ລະດັບ​ພະນັກງານ​ຂະ​ແໜງສາທາລະນະ​ສຸກດ້ວຍ​ການຈັດ​ຊຸດ​ຝຶກ​ອົບຮົມພາຍ​ໃນ​ປະ​ເທດ​ຫົວ​ຂໍ້​ຕ່າງໆໄດ້ 31 ຄັ້ງ​​ ​ເຊິ່ງມີ​ຈໍານວນເຂົ້າ​ຮ່ວມ​ທັງ​ໝົດ 1.789 ຄົນ ​ແລະ ​ໄປ​ຝຶກ​ອົບຮົມ​ຢູ່​ຕ່າງປະ​ເທດ​ໄດ້ 103 ຄົນ.

ເຖິງແມ່ນວ່າວຽກງານການ​ກໍ່ສ້າງ ​ແລະ ບຳລຸງພະນັກງານໃນຂະແໜງສາທາລະນະສຸກມີ​ບາດກ້າວ​ຂະຫຍາຍຕົວໄວ ກໍຕາມແຕ່​ເບິ່ງ​ດ້ານຄຸນນະພາບການກໍ່ສ້າງ ແລະ ບໍາລຸງພະນັກງານຍັງບໍ່ທັນສູງເທົ່າທີ່ຄວນ; ຄວາມຮູ້ຄວາມສາມາດ ແລະ ຄວາມຊໍານິຊໍານານ​ໃນ​ການ​ປະຕິບັດ​ວຽກງານ​ຕົວຈິງທີ່ລົງ​ເລິກໃນ​ແຕ່ລະຂະແໜງການກໍຍັງບໍ່ທັນພຽງພໍ;  ຈັນຍາບັນ, ຈັນຍາທໍາຂອງພະນັກງານຈໍານວນໜຶ່ງຍັງບໍ່ທັນສູງ, ຂາດຄວາມກະຕືລືລົ້ນ, ນໍ້າໃຈອົດທົນຜ່ານຜ່າອຸປະສັກ ແລະ ຂໍ້ຫຍຸ້ງຍາກ; ທັດສະນະທ່າທີການເວົ້າ​ຕໍ່ກັບຄົນ​ເຈັບບໍ່ທັນນິ້ມນວນ, ທ່າທີການຮັບໃຊ້ບໍ່ເໝາະສົມ, ຍັງມີບາງ​ບັນຫາການຈໍາແນກ ແລະ ​ມີ​ລັກສະນະເລືອກ​ເຟັ້ນຄົນເຈັບໃນການ​ໃຫ້ບໍລິການ ​ອີກ​ອັນໜຶ່ງພະນັກງານວິຊາ​ການ​ຂະ​​ແໜງການຍັງຈໍາກັດ ແລະ ສິ່ງຈູງໃຈຍັງບໍ່​ທັນ​ຕອບ​ສະໜອງຊີ​ວິດ​ການ​ເປັນ​ຢູ່​ຂັ້ນ​ພື້ນຖານ ​ໂດຍ​ສະ​ເພາະ​ແມ່ນພະນັກງານ​ຢູ່ເຂດ​ຫ່າງ​ໄກ​ສອກຫຼີກ; ການ​ລົງທຶນ​ໃສ່​ການ​ກໍ່ສ້າງ ​ແລະ ບຳລຸງ​ພະນັກງານຂະ​ແໜງ​ສາທາລະນະ​ສຸກ​ຍັງ​ບໍ່​ທັນ​ຕອບ​ສະໜອງ​ໄດ້ກັບ​ຄວາມ​ຮຽກຮ້ອງ​ການ​ຕົວ​ຈິງ.

​​ໃນ​ຊຸມ​ປີ​ຕໍ່ໜ້າເພື່ອ​ຮັບປະກັນ​ໃຫ້​ພະນັກງານ​ໃນຂະ​ແໜງ​ສາທາລະນະ​ສຸກພຽງພໍທາງ​ດ້ານ​ປະລິມານ ​ແລະ ພຽບພ້ອມ​ໄປ​ດ້ວຍ​ຄຸນ​ນະພາ​ບຮອບດ້ານ ກໍ​ຄື​ຕອບ​ສະໜອງ​ໄດ້​ຕາມຄວາມຮຽກຮ້ອ​ງ​ຕ້ອງການ​ດ້ານ​ບໍ ລິການສຸຂະພາບ​ຂອງ​ປະ​ຊາ​ຊົນບັນດາ​ເຜົ່າ, ໃຫ້​ບັນລຸ​ຍຸດ​ທະ​ສາດ​ພັດທະນາຊັບພະຍາກອນ​ມະນຸດ​ຂະ​ແໜງ​​ສາທາລະນະ​ສຸກ​ຕາມ​ດໍາລັດ​ຂອງ​ນາ​ຍົກລັດຖະມົນ​ຕີ ສະ​ບັບ​ເລກທີ 495/ນຍ, ລົງ​ວັນ​ທີ 25 ​ເດືອນ​ພະຈິກ ປີ 2010; ດັ່ງ​ນັ້ນ, ​ແຕ່​ນີ້ຫາ​ປີ 2020​ ຕ້ອງ​ສຸມ​ໃສ່​ກໍໍ່ສ້າງ ​ແລະ ບໍາລຸງຍົກ​ລະດັບ​​ພະນັກງານ​ໃນຂະ​ແໜງສາທາລະນະ​ສຸກ​ໃຫ້ບັນລຸຄາດໝາຍດັ່ງ​ນີ້:

- ສູ້​ຊົນກໍ່ສ້າງ ​ແລ​ະ ບໍ​າລຸງ​ຍົກ​ລະດັບ​ພະນັກງານ​ຂັ້ນນໍາພາ​ຄຸ້ມຄອງທາງ​ດ້ານ​ທິດສະ​ດີກາ​ນ​ເມືອງ-ການ​ປົກຄອງ​ໃຫ້​ຈົບ​ຊັ້ນ​ກາງ​ຂຶ້ນ​ໄປ, ດ້ານ​ລະດັບ​ວິຊາ​ສະ​ເພາະ​​ໃຫ້ຈົບ​ປະລິນຍາ​ຕີ​ຂຶ້ນ​ໄປ; ພ້ອມ​ນັ້ນ ​ກໍ​ຕ້ອງ​ມີ​ປະສົບ​ການ​ກ່ຽວກັບ​ການ​ບໍລິຫາ​ນຄຸ້ມ​ຄອງ​ຢ່າງ​ໜ້ອຍ 5 ປີ​ຂຶ້ນ​ໄປ, ມີ​ບົດຮຽນ ​ແລະ ​ເຄີຍ​ຮັບ​​ໃຊ້​ວຽກ​ງານ​ຢູ່​ທ້ອງ​ຖິ່ນຮາກ​ຖານ ຫຼື ພາກສະໜາມຕົວ​ຈິງ​ລວມ​ໄລ​ຍະ 2 ປີຂຶ້ນ​ໄປ, ມີ​ພື້ນຖານ​ດ້ານ​ພາສາ​ຕ່າງປະ​ເທດ​ 1 ພາສາ​ຂຶ້ນ​ໄປ; ກໍ່ສ້າງ​ພະນັກງານ​​ນໍາພາ-ຄຸ້ມ​ຄອງລຸ້ນ​ອາວຸ​ໂສ​ໃຫ້​ໄດ້ 25%, ລຸ້ນກາງ​ໃຫ້​ໄດ້ 45%, ລຸ້ນໜຸ່ມ (ລຸ້ນສືບ​ທອດ) ​ໃຫ້​ໄດ້ 30% ຂອງ​ຈໍານ​ວນພະນັກງານນໍາພາຄຸ້ມ​ຄອງຂະ​ແໜງ​ສາທາລະນະ​ສຸກ​ທັງໝົດ; ກໍ່ສ້າງ, ບໍາລຸງຍົກລະດັບພະນັກງານນໍາພາຄຸ້ມຄອງເພດຍິງໃຫ້ໄດ້ 50%, ພະນັກງານຊົນ ເຜົ່າ​ໃຫ້ໄດ້ 35%, ພິການໃຫ້ໄດ້ 1% ຂອງ​ຈໍານ​ວນພະນັກງານນໍາພາຄຸ້ມ​ຄອງ​ສາທາລະນະ​ສຸກ​ທັງໝົດ.

- ສູ້​ຊົນ​ກໍ່ສ້າງ ​ແລະ ບໍາລຸງ​ຍົກ​ລະດັບ​ພະນັກງານຊັ້ນ​ປະລິນຍາ​ເອກ, ຊັ້ນ​ປະລິນ​ຍາໂທ ​ແລະ ຊ່ຽວຊານ​ໃຫ້​ໄດ້ 1.700 ຄົນ; ພະນັກງານ​ຊັ້ນ​ປະລິນຍາ​ຕີ  ​ແລະ ຊັ້ນ​ສູງ​ໃຫ້​ໄດ້ 4.500 ຄົນ; ພະນັກງານ​ຊັ້ນ​ກາງ​ໃຫ້​ໄດ້ 13.000 ຄົນ; ​ສືບ​ຕໍ່​ເຊື່ອ​ມສານຫຼັກສູດ​ທິດ​ສະ​ດີ​ການ​ເມືອງ ​ແລະ ການ​ປົກຄອງ, ຫຼັກສູດ​ບໍລິຫານ​ການ​ຄຸ້ມຄອງຂະ​ແໜງສາທາລະນະ​ສຸກ​ເຂົ້າ​ໃນ​ການ​ຮຽນ-ການ​ສອນ​ຂອງ​​ໂຮງຮຽນ​ການ​ແພດ​​ແຫ່ງຕ່າງໆ; ສືບ​ຕໍ່​ບໍາລຸງ-ຍົກ​ລະດັບ​ພາສາ​ຕ່າງ​ປະ​ເທດ, ຄວາມ​ຮູ້ທາງ​ດ້ານ​ເຕັກ​ໂນ​ໂລ​ຊີ​ຂໍ້​ມູນ​ຂ່າວສານ ​ແລະ ການ​ສື່ສານ, ການ​ຄຸ້ມ​ຄອງ​ບັນ​ຊີ​ການ​ເງິນ​ໃຫ້​ແກ່​ພະນັກງານ​ຄຸ້ມ​ຄອງຂະ​ແໜງສາທາລະນະ​ສຸກ​ໃຫ້​ທົ່ວ​ເຖິງ.

- ສູ້​ຊົນກໍ່ສ້າງ ​ແລ​ະ ບໍ​າລຸງ​ຍົກ​ລະດັບ​ພະນັກງານ​ວິຊາ​ການດ້ານລະດັບສາມັນສຶກສາຈົບຊັ້ນມັດທະຍົມຕອນປາຍໃຫ້ກວມ 90%, ລະດັບທິດສະດີການເມືອງ-ການປົກຄອງຕ້ອງຜ່ານການຮຽນບໍາລຸງ 45 ວັນ ໃຫ້ກວມ 50%, ຈົບຊັ້ນຕົ້ນໃຫ້ກວມ 20%, ຈົບຊັ້ນກາງໃຫ້ກວມ 15% ຂອງຈໍານວນພະນັກງານວິຊາ​ການທັງໝົດ; ລະດັບວິຊາສະເພາະຈົບເໜືອມະຫາວິທະຍາໄລຂຶ້ນໄປໃຫ້ກວມ 90% ຂອງຈໍານວນພະນັກງານວິຊາການທີ່ສັງກັດຢູ່ກະຊວງສາທາລະນະສຸກ, ໂຮງໝໍສູນກາງ, ມະຫາວິທະຍາໄລ ແລະ ສະຖາບັນຄົ້ນຄວ້າສາທາລະນະສຸກ;  ສ່ວນພະນັກງານວິຊາການທີ່ສັງກັດຢູ່ໂຮງໝໍພາກ/ແຂວງ ແລະ ວິທະຍາໄລສາທາລະນະສຸກແຫ່ງຕ່າງໆ ​ໃຫ້​ກວມ 50%, ພະນັກງານວິຊາ​ການ​ທີ່​ສັງກັດ​ຢູ່​ໂຮງຮຽນ​ສາທາລະນະ​ສຸກ​ແຫ່ງ​ຕ່າງໆ ​ໃຫ້​ກວມ 30%; ພ້ອມນັ້ນ ກໍ່ສ້າງ ​ແລະ ບຳລຸງ​ຍົກ​ລະດັບ​ໃຫ້​ແກ່ພະນັກງານຊັ້ນຕົ້ນທາງດ້ານວິຊາສະເພາະເປັນຊັ້ນກາງ ຫຼື ຊັ້ນສູງ; ດ້ານລະດັບພາສາຕ່າງປະເທດໃຫ້ໄດ້ 1 ພາສາຂຶ້ນໄປ ​ໃນລະດັບຕົ້ນໃຫ້ກວມ 45% ແລະ ລະດັບພື້ນຖານໃຫ້ກວມ 25% ຂອງຈໍານວນວິຊາການທັງໝົດ; ກໍ່ສ້າງພະນັກງານວິຊາການເພດຍິງໃຫ້ກວມ 65%, ຊົນເຜົ່າໃຫ້ກວມ 30%, ພິການໃຫ້ກວມ​ເອົາ 1,2% ຂອງພະນັກງານວິຊາການຂອງຂະແໜງສາທາລະນະສຸກ.

- ການປັບປຸງ-ກໍ່ສ້າງພື້ນຖານໂຄງລ່າງແມ່ນສູ້ຊົນກໍ່ສ້າງອາຄານຫຼັງໃໝ່ຂອງມະຫາວິທະໄລວິທະຍາສາດສຸຂະພາບ ໃຫ້ສໍາເລັດ 100% ເມື່ອຮອດປີ 2020 ເພື່ອໃຫ້ເປັນສູນກາງລະບົບການຮຽນ-ການສອນ, ພ້ອມນັ້ນ ​ກໍປັບປຸງຫຼັກສູ​ດການ​ຮຽນ-ການ​ສອນ​ກ່ຽວກັບວິ​ທະຍາ​ໄລ​ສຸຂະພາບ​​ໃຫ້​ໄດ້ມາດຕະຖານ ​ແລະ ພົວພັນ​ຮ່ວມ​ມື​ກັບ​ມະຫາວິທະຍາ​ໄລ, ສະ​ຖາ​ບັນ​ຄົ້ນຄວ້າ​ວິ​ທະຍາ​ສາດ​ສຸຂະພາບ​ຂອງ​ຕ່າງປະ​ເທດ; ກໍ່ສ້າງ​ສະ​ຖາ​ບັນ​ຄົ້ນຄວ້າຂະ​ແໜງ​ສາທາລະນະ​ສຸ​ກ, ປັບ​ປຸງ-ຂະຫຍາຍ​ວິທະຍາ​ໄລສາທາລະນະ​ສຸ​ກ​ໃຫ້ມີ​​ຢູ່​ທຸກ​ພາກ ​ແລະ ​ແຂວງ​ໃຫຍ່​ຈໍານວນ​ໜຶ່ງ; ປັບປຸງ ​ແລະ ຍົກ​ລະ​ດັບ​ໂຮງຮຽນ​ສາທາລະນະ​ສຸກ​ໃຫ້​ເປັນ​ມະຫາວິທະຍາ​ໄລສາທາລະນະ​ສຸກ; ສືບ​ຕໍ່​ກໍ່ສ້າງ ​ແລະ ຂະຫຍາຍ​ພື້ນຖານໂຄງ​ລ່າງ​ລະບົບ​ການ​ຮຽນ-ການ​ສອນ​ແບບ​ທັນ​ສະ​ໄໝ ​ໂດຍ​ນໍາ​ໃຊ້​ລະບົບ TICE (Technologies of Information for Education) ​ໄປ​ສູ່​ບັນດາ​ແຂວງ​ທີ່​ມີ​ວິທະຍາ​ໄລ​ສາທາລະນະ​ສຸກ; ສືບ​ຕໍ່​ກໍ່ສ້າງ​ພື້ນຖານໂຄງ​ລ່າງ​ການ​ຮັບ​​ໃຊ້​ການ​ເຊື່ອມສານ-​ໂຮງໝໍ-ສູນ-ສະ​ຖາ​ບັນ-​ໂຄງການ-​ໂຮງ​ຮຽນ​ແຫ່ງ​ຕ່າງໆ​​ເຊື່ອມເຂົ້າ​ຫາ​ກັນ​ໃຫ້​ມີຢູ່ທຸກແຂວງ ​ແລະ ເມືອງ​ຈໍານວນ​ໜຶ່ງ.

- ດ້ານການ​ບັນຈຸ​ຊັບຊ້ອນ​ພະນັກງານແຕ່​ນີ້​ຫາ​ປີ 2020 ​ໃຫ້​ໄດ້​ປີ​ລະ 1.136 ຄົນ​; ຢູ່​ຂັ້ນ​ສຸກ​ສາ​ລາ​ໃຫ້​ມີ​ລະດັບ​ຊັ້ນສູງ​ຂຶ້ນ​ໄປຫຼາຍກວ່າ 50%; ພ້​ອມນັ້ນ ​ກໍສົ່ງ​ເສີມ​ພະນັກງານ​ທີ່​ມີ​ທັກ​ສະ​ຢູ່​ໂຮງໝໍ​ເມື​ອງ ​ແລະ ສຸກສາລາ ​ເປັນ​ຕົ້ນ​​ແມ່ນ​ແພດ​ຄອບຄົວ, ​ແພດ​ຊັ້ນ​ສູງ, ​ແພດ​ຊັ້ນ​ກາງ; ສືບ​ຕໍ່​ຍົກ​ລະດັບ​ໃຫ້​ພະນັກງານ​ໃນ​ດ້ານ​ທີ່​ຍັງ​ຂາດ​​​​ເຂີນຢ່າງ​ຕໍ່​ເນື່ອງ ​ໂດຍ​ສະ​ເພາະ​ແມ່ນ​ການ​ເຊື່ອ​ມສານລະຫວ່າງ​ເນື້ອ​ໃນຮັກສາ​ສຸຂະພາບ​ຂັ້ນ​ຕົ້ນ​ ​ແລະ ການ​ກອບ​ກູ້​ຊີວິດ.

- ດ້ານ​ການ​ຄຸ້ມ​ຄອງ​ພະນັກງາ​ນເມື່ອຮອດ​ປີ 2020 ​​ຕ້ອງມີ​ລະບົບ​ຄຸ້ມ​ຄອງ​ດ້ວຍ​ຖານ​ຂໍ້​ມູນ​ທີ່​ທັນ​ສະ​ໄໝ ​ໃຫ້ກວມ 100% ຂ​​ອງພະນັກງາ​ນ​ໃນ​ທົ່ວ​ຂະ​ແໜງສາທາ​ລະນະ​ສຸກ; ​ການ​ກໍາ​ນົດຄວາມ​ຕ້ອງການ ​ແລະ ການວາງ​ແຜນ​ພັດທະນາ​ພະນັກງານ​ສາທາລະນະ​ສຸກ​ຕ້ອງມີ​ລຸ້ນສືບ​ທອດ, ປັບປຸງ​ຄືນ​ໃໝ່​ກ່ຽວກັບ​ພາລະ​ບົດບາດ, ຕໍາ​ແໜ່ງ ​ແລະ ມາດຖານ​ຕໍາ​ແໜ່ງງານ​ຂອງ​ພະນັກງານຂະ​ແໜງ​ສາທາລະນະ​ສຸກ​ທີ່​ໄດ້​ກໍາ​ນົດ​ໄວ້​ແລ້ວ ​ເພື່ອ​ເຮັດ​ໃຫ້​ລະບົບ​ການ​ຄຸ້ມ​ຄອງ​ຂະ​ແໜງສາທາລະນະ​ສຸກ​ຂອງ​ ສປປ ລາວ​ ມີຄວາມ​ໜັ​ກ​ແໜ້ນ​ເຂັ້ມ​ແຂງ ​ແລະ ຮັດກຸມ​ກວ່າ​ເກົ່າ, ຮັບປະກັນ​ດ້ານ​ສິດທິ ​ແລະ ຜົນ​ປະ​ໂຫຍ​ດຂອງ​ການ​ປະຕິ​ບັດງານ, ທັງ​ສາມາດ​ເຊື່ອມ​ໂຍງ​ເ​ຂົ້າກັບ​ພາກ​ພື້ນ ​ແລະ ສາກົນ.

- ດ້ານ​ການ​ພັດທະນາ​ນິຕິ​ກໍາ​ສືບ​ຕໍ່​ກວດກາ, ປັບ​ປຸງ ​ແລະ ສ້າງ​ນິຕິ​ກໍາ​ທີ່​ຈໍາ​ເປັນຕື່ມ​ ​ໂດຍ​ສະ​ເພາະ​ແມ່ນກ່ຽວກັບ​ການ​ຄຸ້ມ​ຄອງ​ການ​ພັດທະນາ​ພະນັກງານ​ສາທາລະນະ​ສຸກ​ຢູ່​ສະ​ຖາ​ບັນ​ການ​ສຶກສາ​ຂອງ​ຂະ​​ແໜງສາທາ​ລະນະ​ສຸກ, ​ໂຮງໝໍ, ຄຣີນິກ, ​ໂຮງງານ​ຜະລິດ​ຢາຫຼວງ-ຢາພື້ນ​ເມື​ອງ, ​ອາຫານ-​ເຄື່ອງ​ດື່ມປະ​ເພດຕ່າງໆ ທັງ​ພາກ​ລັດ ​ແລະ ​ຂອງ​ເອກະ​ຊົນ​ໃຫ້​ຄົບ​ຖ້ວ​ນ, ຮັດກຸມ.

ເພື່ອ​ເຮັດ​ໃຫ້​ຍຸດທະ​ສາດ​​ໃນ​ການພັດທະນາ​ຊັບພະຍາກອນ​ມະນຸດ​ດ້ານພະນັກງານ​ສາທາລະນະ​ສຸກ​​ໃຫ້​ບັນລຸ​ຄາດໝາຍທີ່​ວາງ​ໄວ້ນັ້ນ ຄະນະ​ພັກ-ຄະນະ​ນຳກະຊວງ​ສາທາລະນະ​ສຸ​ກຕ້ອງ​ເປັນ​ເຈົ້າ​ການ​ໃນ​ການ​ແນະ​ນໍາ​, ​ເຜີຍ​ແຜ່, ຄົ້ນ​ຄວ້າ, ​ເຊື່ອມ​ຊຶມ, ຜັນ​ຂະຫຍາຍ ​ແລະ ຈັດ​ຕັ້ງ​ປະຕິ​ບັດ​ຍຸດ​ທະ​ສາດ​​ຢ່າງ​ເປັນ​ລະບົບ​ຕໍ່​ເນື່ອງ ດ້ວຍ​ການ​ຫັນ​ເປັນ​ນິຕິກໍາ, ​ແຜນ​ງານ, ​ໂຄງການ​ອັນ​ລະອຽດ, ນໍ​າ​ໃຊ້, ຄຸ້ມ​ຄອງ, ປະຕິ​ບັດ​ນະ​ໂຍບາຍ, ສົ່ງ​ເສີມ ​ແລະ ​ໃຫ້​ໂອກາດ​ພະນັກງານ​ເທົ່າທຽມກັນ. ​ພ້ອມ​ນັ້ນ ​ກໍສົມທົບ​ກັບ​ບັນດາ​ຂະ​ແໜງການ​ ​ແລະ ອົງການ​ປົກ​ຄອງ​ທ້ອງຖິ່ນ​ກໍ່ສ້າງ​ພະນັກງານ​​ໃຫ້​ໄປ​ຕາມເປົ້າໝາຍ; ​ຕັ້ງໜ້າຈັດ​ຕັ້ງ​ປະຕິ​ບັດແຜນ​ພັດທະນາ​ໃນ​ແຕ່ລະ​​ໄລຍະ​​ໃຫ້​ສ່ອດຄອງ​ກັບ​ຍຸດ​ທະ​ສາດ​ພັດທະນາ​ພະນັກ​ງານ​ຂະ​ແໜງສາທາລະນະສຸກ​ເພື່ອ​ຍາດ​ແຍ່ງ​ເອົາການ​ຊ່ວຍ​ເຫຼືອຈາກ​ອົງການ​ຈັດ​ຕັ້ງ​ສາກົນ​ໃຫ້ຫຼາຍຂຶ້ນ​ກວ່າ​ເກົ່າ; ຄຽງຄູ່​ກັນ​ນັ້ນ​ບັນດາ​ກະຊວງ, ອົງການ​ຈັດ​ຕັ້ງ​ທາງ​ສັງຄົມ, ພາກເອກະ​ຊົນ ກໍ​ຕ້ອງ​ໃຫ້​ຄວາມ​ຮ່ວມ​ມື ​ແລະ ​ປະກ​ອບສ່ວນ​​​ໃນການກໍ່ສ້າງ​ພະນັກງານ​ຂະ​ແໜງສາທາລະນະ​ສຸກ​​ໃຫ້ຮັບປະກັນ​ທາງ​ດ້ານ​ປະລິມານ ​ແລະ ຄຸນ​ນະພາ​ບພຽບພ້ອມ​ໄປ​ດ້ວຍ​ຄຸນ​ສົມບັດ​ສິນ​ທໍາ​ປະຕິວັດ, ຈັນ​ຍາ​ບັນ, ຈັນຍາ​ທໍາ, ມີທ່າ​ທີ່​ການ​ຮັບ​ໃຊ້​ທີ່​ດີ ​ກໍ​ຄືການໃຫ້​ບໍລິການ​ດ້ານສຸຂະພາບ​ຂອງ​ປະຊາຊົນ​ບັນດາ​ເຜົ່າ​ຢ່າງ​ທົ່ວ​ເຖິງ ​ແລະ ມີ​ຄຸນ​ນະພາບສູງ​ກ​ວ່າເກົ່າ./.

 

(1) ເອກ​ະສານ​ກອງ​ປະຊຸມ​ໃຫຍ່​ຄັ້ງ​ທີ X ຂອງພັກປະຊາຊົນປະຕິວັດລາວ, ປີ 2016, ໜ້າທີ 99.